Еден месец откако стапи на сила забраната за социјални мрежи во Австралија за лица под 16 години, ефектите се видливи, но не се исти за сите. Четиринаесетгодишната Ејми вели дека се чувствува слободно за прв пат по долго време. По почетната навика инстинктивно да посегнува по Snapchat, таа постепено престана да го користи телефонот, почна повеќе да трча, им се јавуваше на пријателите и значително го намали времето поминато на екранот, пишува BBC.
Забраната опфаќа платформи како Instagram, TikTok и Snapchat, а Ејми опишува како притисокот од одржување на онлајн присуство исчезна. Денес, таа го користи телефонот поретко и само кога навистина ѝ е потребен.
„Јас го користам Snapchat со лажен датум на раѓање“
Но, искуствата на другите тинејџери се различни. Тринаесетгодишниот Ахил вели дека „ништо не се променило“ за него. Тој сè уште поминува околу два и пол часа дневно онлајн, користејќи YouTube, Snapchat со лажен датум на раѓање и платформи за игри како Roblox и Discord, кои не се опфатени со забраната. Неговата мајка забележува дека е малку понамрштен и игра повеќе видео игри.
Слично е и со 15-годишната Лулу, која отвори нови сметки на TikTok и Instagram од 16-годишна возраст. Сепак, таа вели дека сега чита малку повеќе и ги користи социјалните мрежи посвесно.
Тие комуницираат преку апликации кои не се забранети
Психолозите предупредуваат дека забраната може да предизвика краткорочна раздразливост кај некои млади луѓе бидејќи социјалните мрежи често се механизам за справување со стресот и досадата. Она што им е заедничко на многу тинејџери е тоа што се префрлиле на апликации кои не се забранети како WhatsApp и Messenger за да останат во контакт со пријателите.
Пред забраната, некои млади луѓе бараа алтернативи на помалку познати апликации или VPN мрежи, но тој тренд брзо се намали. Експертите истакнуваат дека влегувањето во игри како Roblox или Minecraft е потешко и бара повеќе знаење и опрема, па затоа тие не се целосна замена за социјалните мрежи.
„Резултатите од забраната се веќе видливи“
Австралиската влада тврди дека забраната веќе покажува резултати и дека другите земји размислуваат за сличен модел, додека официјалните бројки сè уште се чекаат. За Ејми, барем засега, промената е позитивна. Нејзиното време на социјалните мрежи се преполови, а нејзината мајка вели дека таа изгледа позадоволна. Сепак, сите се согласуваат за едно: дали забраната ќе донесе повеќе придобивки или проблеми на долг рок, само времето ќе покаже.
© Vecer.mk, правата за текстот се на редакцијата
