Еден од наједноставните начини да ги искористите вишокот велигденски јајца е кремастата салата која може да послужи како појадок, ужина или дури и лесен ручек. Она што ја прави посебна е совршениот баланс помеѓу едноставноста и вкусот, а сите состојки веројатно веќе ги имате дома по Велигден.
Салата од варени јајца
Состојки:
- Варени јајца
- Малку целер
- Власец или млад кромид
- Сок од лимон
- Мајонез
- Сенф
- Сол и бибер
Подготовка: Подготовката е едноставна и не бара посебни кулинарски вештини. Јајцата излупете ги и исечкајте ги на поситни или покрупни парчиња, во зависност од тоа каква текстура сакате. Ако сакате покремаста варијанта, можете посебно да ги изгмечите жолчките, па дури потоа да ги измешате со остатокот.
Целерот исечкајте го на многу ситни парчиња – тој го дава оној пријатен „рскав“ контраст што ја прави оваа салата поинтересна. Потоа додајте го сечканиот власец или младиот кромид и соединете сè заедно.
Следниот чекор е додавање на мајонезот и сенфот. Количината прилагодете ја по сопствен вкус – некој сака погуста салата, додека други претпочитаат варијанта што полесно се мачка. На крајот, додајте малку сок од лимон кој ќе ја „разбие“ тежината на јајцата и ќе и даде освежителна нота на салатата.
Добро промешајте и салатата е подготвена за сервирање. Најдобро е да отстои неколку минути за да се поврзат вкусовите.
Совет плус: Овој рецепт можете лесно да го прилагодите – ако сакате пикантно, додајте малку лута пиперка. За медитерански шмек, уфрлете оригано или босилек. Ако сакате поконкретен оброк, слободно додајте пилешко месо или дури малку туна.
© Vecer.mk, правата за текстот се на редакцијата
