Цените на нафтата на светските берзи забележаа нов раст откако американскиот претседател Доналд Трамп ја заврши посетата на Кина и најави дека Вашингтон повторно се фокусира на кризата со Иран и безбедноста на енергетските коридори. Суровата нафта Брент поскапе за 2,4% надминувајќи 108 долари за барел, додека американската WTI достигна над 104 долари.
Пазарите будно ја следат состојбата околу Ормутскиот теснец, каде серијата поморски инциденти и заплени на танкери создаваат сериозна нервоза.
За време на самитот во Пекинг, Трамп и Си Џинпинг детално разговарале за овој стратешки премин. Според американски извори, Кина строго се противи на каква било милитаризација или ограничување на транспортот, бидејќи кинеската економија е директно зависна од стабилноста на оваа рута.
По средбата, Трамп изјави дека Кина покажала интерес за зголемени набавки на американска нафта од Тексас, Луизијана и Алјаска, иако Пекинг сè уште нема официјална потврда за ваков договор.
Иако ОПЕК+ најави зголемено производство, аналитичарите предупредуваат дека клучниот проблем сега е безбедноста на транспортот. Поради ризиците во Персискиот Залив, дел од компаниите веќе пловат околу Африка, што драстично ги зголемува трошоците и го продолжува времето на испорака.
Овој тренд веќе создава притисок врз глобалната инфлација, а доколку кризата продолжи, Европа и Балканот набрзо ќе се соочат со нов бран поскапувања на горивата и производствените трошоци.
© Vecer.mk, правата за текстот се на редакцијата
