Побарувачката за приватни чартер летови од Блискиот Исток е нагло зголемена од почетокот на конфликтот меѓу САД, Израел и Иран, а оние кои можат да си го дозволат тоа плаќаат астрономски цени за да го напуштат регионот.
Војната, која започна на 28 февруари, предизвика најголемо нарушување на воздушниот сообраќај низ регионот на Заливот од пандемијата Ковид-19. Комерцијалниот воздушен сообраќај е сериозно нарушен поради затворањето на воздушниот простор поради континуираните напади со ракети и беспилотни летала, пишува CNN.
„Побарувачката за приватни чартер летови значително се зголеми во последните денови, бидејќи закажаните летови во делови од регионот станаа ограничени или несигурни“, изјави за CNN Џон Метјуз, претседател и основач на компанијата за приватни авиони AirX.
Десетици илјади патници останаа заглавени, и додека некои авиокомпании сега повторно воспоставуваат ограничен број рути, оние со исклучително длабоки џебови најдоа начин да го заобиколат хаосот со изнајмување приватен авион.
„Барањата ни ги испраќаат исклучително богати семејства, мултинационални корпорации кои ги преместуваат своите менаџери, но и поголеми групи како што се спортски тимови и продукциски тимови кои сè уште мора да се преселат заедно“, додаде Метјуз.
Скок на побарувачката и цените
Бернардус Ворстер, извршен директор на чартер компанијата SHY Aviation, изјави за CNN дека под нормални околности има околу 10 до 15 летови со приватен авион дневно од Мускат, Оман, Дубаи и саудискиот главен град Ријад.
Минатата среда, тој број скокна на 98.
Зголемената побарувачка, ограничениот број на достапни авиони и повисоките трошоци за осигурување доведоа до повисоки од вообичаените цени, објасни Ворстер. Цената е зголемена и од фактот дека авионите се враќаат во регионот претежно празни, што значи дека клиентите плаќаат за патувањето во двата правци.
Лет што чинеше 60.000 долари сега чини 145.000 долари
Како пример, тој наведе лет за група од 12 лица и нивното куче од Мускат до Истанбул, петчасовно патување што чинеше 145.000 долари. Пред конфликтот, истиот лет би чинел околу 60.000 долари, што е зголемување од 142 проценти.
Ворстер објасни дека на почетокот на конфликтот, Мускат и Ријад биле претпочитани аеродроми за полетување бидејќи воздушниот простор и коридорите за летови биле попредвидливи. Во меѓувреме, Дубаи станал попопуларен бидејќи емиратот е дом на многу луѓе кои се обидуваат да го напуштат регионот.
„Истанбул е најпопуларната дестинација поради неговата близина до регионот“, рече Ворстер, додавајќи дека има и летови до Атина и Мумбаи.
Ограничен дофат на приватни летови
И покрај големата побарувачка, приватните чартери нема да можат значително да ги ублажат прекините во патничкиот сообраќај на Блискиот Исток, и поради превисоките трошоци и недоволниот капацитет.
„Приватните чартери не можат да го заменат опсегот на мрежите на комерцијални авиокомпании, но можат да обезбедат контролирана мобилност за организации и групи кои треба брзо да се движат кога редовните услуги стануваат нередовни“, рече Метјуз.
Тој додаде дека минатата недела AirX склучил договор за чартер во вредност од околу еден милион евра за авион со 100 седишта.
Ворстер, исто така, призна дека влијанието на приватните чартери врз пошироката криза ќе биде ограничено поради малиот број патници.
„Просечниот приватен авион превезува 12 лица. Иако во регионот има околу 40-50 авиони на располагање, бројот на превезени патници е релативно низок“, рече тој, додавајќи дека неговата компанија превезла околу 120 лица од Блискиот Исток во изминатата недела.
Во моментов, десетици илјади луѓе се обидуваат да го напуштат регионот, а владите ширум светот организираат летови за репатријација.
Американскиот Стејт департмент во понеделник објави дека обезбедил повеќе од дваесет чартер летови и евакуирал илјадници Американци. Високиот функционер додаде дека „достапноста на комерцијални летови низ целиот регион продолжува да се подобрува“.
© Vecer.mk, правата за текстот се на редакцијата
