Руската централна банка поднесе тужба барајќи 18,2 трилиони рубљи, или 194,8 милијарди евра, како отштета од белгискиот централен депозитар за хартии од вредност Euroclear, објави денес московскиот суд.
„На 12 декември 2025 година, Московскиот арбитражен суд ја прими тужбата на Централната банка на Руската Федерација против Euroclear Bank SA/NV. Износот на тужбата е 18.172.971.903.836 рубљи“, објави прес-службата на судот, пренесува ТАСС.
Износот од 18.172.971.903.836 рубљи одговара на износот од 194,8 милијарди евра.
Euroclear ги држи поголемиот дел од средствата замрзнати од Европската Унија откако Русија започна воена акција во Украина, наведува Ројтерс, додавајќи дека тужбата е одговор на плановите на ЕУ да ги користи замрзнатите средства за финансиска помош на Украина.
Агенцијата проценува дека се очекува московскиот суд да донесе брза пресуда во корист на централната банка, која потоа може да продолжи со нејзино извршување во други јурисдикции.
На 12 декември, владата на ЕУ се согласи да ги замрзне средствата на руската централна банка што се чуваат во Европа на неодредено време, отстранувајќи ја големата пречка за користење на готовината за да ѝ се помогне на Украина да се одбрани од Русија.
Централната банка истиот ден изјави дека плановите на ЕУ да ги користи нејзините средства се нелегални и дека го задржува правото да ги користи сите расположливи средства за да ги заштити своите интереси.
© Vecer.mk, правата за текстот се на редакцијата
