Влошувањето на трговската војна со Соединетите Американски Држави би можело да ја продолжи рецесијата на Германија за уште две години, со остар пад на извозот и значителна неизвесност што ќе ги оптовари инвестициите, предупреди Германската централна банка (Бундесбанк).
Доколку царинските мерки што ги објави американскиот претседател Доналд Трамп бидат целосно спроведени во јули, без секторски исклучоци и со еквивалентни одмазднички мерки од Европската Унија, бруто домашниот производ (БДП) на Германија би се намалил за 0,5 проценти оваа година и за 0,2 проценти во 2026 година, според прогнозите на Бундесбанк.
Растот би се вратил во 2027 година, со закрепнување од еден процент.
Затоа, тој глобален царински шок би го зголемил притисокот врз германската економија, која е веќе ослабена по две години рецесија во 2023 и 2024 година, поврзана со слабата домашна побарувачка и губењето на конкурентноста во извозниот индустриски сектор, особено во автомобилската и хемиската индустрија, објавува Бета.
Влијанието врз вработеноста исто така би било огромно, со очекувана загуба на 90.000 работни места во Германија доколку се воведат царини од 25 проценти, соопшти германската федерална агенција за вработување.
„Непредвидливата трговска политика на САД врши притисок врз германскиот пазар на трудот. Проблемот е недостатокот на предвидливост, што предизвикува значителна штета, бидејќи ги спречува компаниите да инвестираат, вработуваат и обучуваат персонал“, додаде агенцијата.
© Vecer.mk, правата за текстот се на редакцијата
