Европската комисија го одобри проширувањето на буџетот на Германија, иако нејзиниот предложен план за трошење првично ги надминува фискалните ограничувања на Европската Унија, објави бриселскиот весник „Политико“.
Одлуката ѝ овозможува на Германија значително да ги зголеми трошоците за одбрана и обнова на инфраструктурата, процес што Брисел долго време го поддржува.
Според високи претставници на Комисијата кои зборуваа под услов на анонимност бидејќи не беа овластени да зборуваат, седумгодишниот план за трошење на Германија сега е во согласност со правилата на ЕУ, иако долгот и дефицитот на земјата ќе се зголемат во наредните години, пред да се намалат до 2029 година.
Во наредните години, Германија ќе го зголеми својот дефицит, кој ќе достигне 3,8 проценти од БДП до 2026 година, што е далеку над горната граница на ЕУ од три проценти.
Сепак, планот предвидува дефицитот да се намали на 1,9 проценти од БДП до 2029 година, што би ги пренасочило фискалните текови на Германија кон стабилност, наведува „Политико“.
Долгот на Германија кон БДП, исто така, ќе се зголеми, од 64 проценти во 2025 година на 66,5 проценти во 2029 година, пред да се намали.
Службениците на ЕУ истакнуваат дека ова зголемување на јавните расходи е привремено и нема да ја загрози фискалната стабилност на земјата на долг рок.
Германија побара продолжување на својот фискален план од четири на седум години за да ѝ се даде повеќе време да го намали дефицитот и долгот, што беше одобрено.
Како дел од ова продолжување, Германија вети дека ќе ги усвои препораките на ЕУ, вклучително и намалување на бирократијата и прифаќање на повеќе висококвалификувани мигранти, кои се важни за континуираниот раст и конкурентноста на земјата.
Како што е планирано, Комисијата ќе ја објави својата прелиминарна проценка во ноември 2025 година за тоа дали земјите-членки на ЕУ се на добар пат да ги исполнат своите долгорочни обврски за трошење, што ќе вклучува анализи на ефектите од овие мерки врз фискалната стабилност и економскиот раст.
© Vecer.mk, правата за текстот се на редакцијата
