Цените на нафтата продолжуваат да се намалуваат откако американскиот претседател Доналд Трамп изјави дека САД се „многу блиску“ до договор со Техеран. Овие сигнали за дипломатски напредок, заедно со актуелното примирје во Либан, ги охрабрија инвеститорите, спуштајќи ја цената на барелот под психолошката граница од 100 долари.
Ситуацијата околу Ормутскиот Теснец останува клучна за глобалниот пазар. По седумнеделната блокада која го прекина снабдувањето со 13 милиони барели нафта дневно, најавата за преговори меѓу американските и иранските претставници носи надеж за нормализација. Иако претстои уште работа до целосен мировен договор, сегашните преговори за меморандум се сметаат за прв чекор кон спречување нов конфликт. Експертите најавуваат период на варирање на цените, но очекуваат стабилизација штом првите танкери повторно ќе поминат низ стратешкиот теснец без пречки.
© Vecer.mk, правата за текстот се на редакцијата
