Хрватскиот Сабор в четврток ќе расправа за предлог-законот за управување и одржување на згради, кој предизвика голем интерес во јавноста, а со кој има намера да се ограничи пренамена на станови во туристички апартмани и други форми на краткорочно изнајмување.
На сопствениците кои сакаат да ги пренаменат становите во иднина ќе им треба согласност од 80 отсто од косопствениците на зградата.
Ова сериозно може да го наруши пазарот на популарната страница за издавање AirBnb.
Според податоците од надлежните институции, 40 отсто од вкупниот станбен фонд во Хрватска не се користи за домување. Целта е тие околу 908.000 станови да се вратат во првобитната намена, нагласи ресорниот министер Бранко Бачиќ.
Казни се пропишани за сопствениците на станови кои самоволно затвораат балкони, градат настрешници или поставуваат клима уреди на фасадата.
Бачиќ изјави дека со новиот закон за управување и одржување на зградите е речиси невозможна краткотрајната закупнина во повеќестанбените згради за крајната цел – обезбедување на достапно домување.
Се зафативме со ограничување и речиси спречување на пристапот до краткорочни изнајмувања во повеќестанбени згради, за што ќе биде потребна согласност од 80 проценти од сосопствениците. Свесни сме дека ќе биде тешко бидејќи меѓу тие 80 проценти ќе треба да бидат првите соседи, не бегаме од тоа, рече Бачиќ презентирајќи ја сметката пред пратениците.
„Отворено кажуваме дека нашата цел во повеќестанбените згради е максимално да ги спречиме краткорочните изнајмувања и да испратиме порака дека поддржуваме изнајмување, но долгорочно“, додаде тој.
Тој рече дека ограничувањето на краткорочните изнајмувања нема да се применува ретроактивно, иако дел од научната заедница која се занимава со уставното право е на став дека Собранието може ретроактивно да го спроведе законот преку своја политичка одлука.
Бачиќ нагласи дека дури 40 отсто од 2,3 милиони станбени единици не се наменети за домување. Околу 600.000 се празни станови, 230.000 се под кирија, а 115.000 се користат за деловни активности. Ова, следствено, доведе до недостиг на станови и значителна побарувачка.
Целите на законот се голем дел од станбените единици да се вратат во првобитната функција, да се придонесе во мерките за одржлив и квалитетен туризам преку ограничување на пристапот до краткорочни изнајмувања и преку мерките да се овозможи пад на реалната цените на имотот и киријата, со цел да се дојде до прифатлива кирија, рече министерот.
Новина во законот е забраната за поставување климатизери на фасадите на зградите, како и можноста за поставување лифтови во сите згради со три или повеќе ката.
© Vecer.mk, правата за текстот се на редакцијата
