Бурна зима и можност за поплави го очекуваат Балканот, вели новата анализа на AccuWeather, чии метеоролози ги проучувале поларните бури и струи кои ќе надвиснат над Европа, пренесува Нова. Најлошите невремиња ќе бидат во Шпанија и јужна Франција, а зимата ќе наликува на онаа лани – непредвилдива и со големи температурни промени. Целата влага во Европа, всушност ќе биде по влијание на феноменот наречен „Ла Ниња“(девојче), кој веќе ја менува климата во Северна Америка.
– Некои од најсилните бури најверојатно ќе се случат некаде на југот на Франција, Шпанија или Португалија оваа зима – предупреди метеорологот Тајлер Ројс. – Дури и без бурни ветрови, другите делови на јужна Европа се соочуваат со влажна зима.
Обилната влага ќе влезе од Медитеранот во Италија, Балканот и поголемиот дел од Турција. Според метеорологот Алан Реперт, затоа во овие области се очекува невреме по невреме.
– Дури и умерените врнежи може да резултираат со брзо истекување на реките, што може да предизвика значителни поплави – предупредуваат метеоролозите.
Неочекуван студ на периоди, а потоа топло над просекот
Се очекува температурите во поголемиот дел од јужна Европа да останат просечни, но во делови од Италија, Грција и Балканот тие би можеле да бидат над просекот, вели Ројс. Ова важи за делови од Источна Европа кои ќе бидат во фокусот оваа зима поради неочекуваното студено време.
– Доколку налетот на студен воздух го испушти поларниот вител, тој студ ќе заврши во делови од Источна Европа – рече Ројс.
Влагата од Балканот ќе продолжи во северните земји
Температури за неколку степени под просекот се очекуваат во областа од централна Украина до Латвија и Естонија и до Словачка и Полска. А, како абнормалниот студ да не е доволен, регионот може да се подготви за повеќе зимски „замки“.
Истото активно невреме што ќе го зголеми ризикот од поплави низ Италија и Балканот оваа зима, ќе донесе неповолни временски услови и во Источна Европа. Влагата од Балканот веројатно ќе продолжи на север и ќе се измеша со ледениот воздух во поладните европски земји, што ќе доведе до чести периоди на дожд и снег во поголемиот дел од внатрешноста на Источна Европа.
Шведска, Норвешка и Германија ќе имаат сува зима
Северна Европа ќе биде поштедена од бури и нестабилно време. Продолжено суво време се очекува за источна Франција, Германија, Шведска и Норвешка. Во тие земји, студениот и влажен воздух ќе стигне подоцна во зимата, велат синоптичарите.
