Премиерот Црна Гора, Здравко Кривокапиќ, ја презеде координацијата со Министерството за правда, човекови и малцински права, јавуваат локалните медиуми.

Досега со тој сектор раководеше министерот за внатрешни работи Сергеј Секуловиќ.

Во известувањето на Владата, кое денеска е доставено до Министерството, се посочува дека Кривокапиќ е назначен да раководи со овој ресор до изборот на министер.

Секуловиќ ја презеде функцијата на овој ресор, откако Владимир Лепосавиќ беше сменет од министерската функција на 17 јуни минатата година, поради негирање на геноцидот во Сребреница.

Секуловиќ беше еден од министрите кои застанаа на страната на Дритан Абазовиќ откако Граѓанското движење УРА му ја предаде на Собранието на Црна Гора иницијативата за гласање недоверба на Владата на Здравко Кривокапиќ.

Исто така, на последната седница на Владата, полна со тешки зборови, тој беше против предлогот на премиерот Здравко Кривокапиќ да се гласа за скратување на мандатот на парламентот, што следеше веднаш по иницијативата на ГП УРА.

Покрај Секуловиќ, против беше Абазовиќ, а воздржани беа министрите Младен Бојаниќ (капитални инвестиции), Ѓорѓије Радуловиќ (надворешни работи), додека Тамара Срзентиќ (јавна администрација и медиуми) беше воздржана.

Според медиумите, тогаш министерката за одбрана Оливера Ињац имала вербален напад со  Секуловиќ, а посебна улога имала министерката за образование, наука, култура и спорт Весна Братиќ, која противниците на предлогот на премиерот ги нарекла предавници.

Владата на денешната седница ќе гласа и за предлогот на премиерот за смена на Абазовиќ од функцијата претседател на Националниот совет за борба против високата корупција.