Грција воведе доброволна шестдневна работна недела во одредени индустрии за да го поттикне економскиот раст и да ја зголеми продуктивноста, и покрај противењето на синдикатите кои велат дека овој потег нема да го реши недостигот на работна сила во земјата.

Според грчките власти, шестдневната работна недела се однесува само на приватните бизниси во Грција кои обезбедуваат услуги 24 часа на ден.

Како дел од продолжената работна недела, персоналот во избраните индустрии и производствени погони ќе има можност да работи дополнителни два часа дневно или дополнителни осумчасовни смени, со компензација од 40 отсто од редовната дневна плата, пишува Гардијан.

Грчката влада, предводена од премиерот Киријакос Мицотакис, вели дека мерката, која стапи на сила вчера, е неопходна поради намалувањето на населението и недостигот на квалификувани работници во Грција.

Синдикатите се спротивставија

Се проценува дека околу 500.000 млади, образовани Грци ја напуштиле земјата од почетокот на должничката криза што избувна кон крајот на 2009 година, а Мицотакис овие демографски податоци ги нарече „темпирана бомба“.

Синдикатите жестоко се спротивставија на оваа мерка која ја означија како „варварска“ во време кога некои европски земји размислуваат во спротивна насока и експериментираат со четиричасовна работна недела.

- Овие мерки ги донесе влада која идеолошки е посветена на создавање на се поголем профит за капиталот. Подобрата продуктивност доаѓа со подобри работни услови, подобар квалитет на живот за вработените, а тоа, сега знаеме, се помалку работни часови, а не повеќе, рече Акис Сотиропулос, член на извршниот одбор на синдикатот на државните службеници „Адеди“.

Ова е ВАРВАРСКА ОДЛУКА! Грција воведува правила кои ги РАЗБЕСНЕА луѓето!