Вишиот суд во Краљево им одреди притвор на Д.Р. (50) и М.Р. (42) во траење до 30 дена, осомничени за планирање на убиство на српскиот претседател Александар Вучиќ и членовите на неговото семејство, потврдија за Танјуг во тој суд.
Тие се притворени за да не го повторат кривичното дело или да не го завршат обидот или заканата од кривично дело.
Тие се осомничени за сторено кривично дело подготовка на кривично дело против уставниот поредок и безбедноста на Србија, во врска со кривичното дело напад врз уставниот поредок.
Осомничени се дека, како што објави Министерството за внатрешни работи, од декември минатата година до февруари оваа година, тие договориле насилна промена на уставниот поредок на Србија и соборување на највисоките државни власти.
Осомничени се дека договориле набавка на оружје и напад врз животот и телото на претседателот на Србија, неговата сопруга и децата, на таков начин што ќе бидат лишени од живот, како и напад врз припадници на МУП на Република Србија, на таков начин што ќе им нанесат телесни повреди на припадниците на МУП.
Претседателот на Србија, Александар Вучиќ, се обрати на медиумите по отворањето на изложбата на елементи регистрирани во Националниот регистар на нематеријални културни добра „Нити државности“, зборувајќи, меѓу другото, за апсењата за обидот за убиство врз него.
Запрашан за коментар за апсењето на лица осомничени дека планирале да го убијат, Вучиќ рече дека не навлегува во деталите од материјалот што го добил.
„Она што го добив во материјалот, не знам точно за кои луѓе станува збор, знам од каде се, ги знам нивните години, па не навлегувам во сè друго. Единственото нешто што успеав да го видам е како треба да го тепаат моето дете до точка да цркне, до тоа да го колат. И гледам дека има 70 луѓе кои се залагаат тие луѓе да бидат ослободени“, рече Вучиќ.
„Станува збор за луѓе кои би колеле нечии деца, тоа го имаме евидентирано како доказ. Ако ви ја кажам причината, нема да ми верувате. Се базира на лаги што можеби ги прочитале некаде“, додаде тој.
© Vecer.mk, правата за текстот се на редакцијата
