Црногорската влада ја ограничи цената на белиот леб на 50 центи во четвртокот и донесе одлука за дистрибуција на 64,000 литри масло за јадење на сиромашните граѓани за да се намали ударот врз животниот стандард.
Во последните денови Црна Гора бележи пораст на цените на основните прехранбени производи, така што потрошувачката корпа за четиричлено семејство порасна на 656,90 евра, а просечната плата е нешто повеќе од 500 евра.
Тоа е одговор на наглиот скок на цените на стоките,со што Владата се однесува одговорно во услови на криза, не намалувајќи ги платите и пензиите и помагајќи им на социјално загрозените групи, соопшти владата.
Опозицијата вели дека потегот укажува на тешка криза која потсетува на 90-тите години на минатиот век.
„Неповолната економија, повампирениот национализам и општата состојба во земјата е декор што нè потсетува на враќање во 90-тите години на минатиот век, кога граѓаните чекаа во ред за дистрибуција на основните прехранбени производи поради санкциите и инфлацијата“, велат од Демократската партија на социјалистите на Џукановиќ.
БДП минатата година падна за 15,2 проценти, пред се поради влијанието на пандемијата врз туризмот, што претставува петтина од националната економија.
Според предвидувањата на Европската банка за обнова и развој, Црна Гора годинава треба да оствари раст од 8,5 проценти.
