Новинарите и вработените во телевизијата Н1 денеска се собраа пред седиштето на медиумот во Белград за да го изразат својот револт и загриженост по ненадејната смена на програмскиот директор, Игор Божиќ. Собирот, на кој присуствуваа и претставници на новинарски здруженија, беше јасен сигнал до новиот менаџмент дека уредувачката независност е под знак прашалник.
Божиќ минатиот петок бил известен од новото раководство дека е разрешен од функцијата и дека неговиот иден статус во компанијата допрва ќе го решава одборот на „Адриа њуз нетворк“ (Adria News Network). Дотогаш, тој останува нераспореден и без право да раководи со редакцијата.
Според зборовите на новинарот Младен Саватовиќ, вработените се крајно загрижени бидејќи промените им биле соопштени на многу лош начин, без официјално објаснување за причините зад ваквата одлука.
„Никој не дојде да ни објасни зошто Игор Божиќ веќе не е програмски директор и што значи тоа за нашата понатамошна работа. Немаме гаранции дека уредувачката политика нема да се промени“, изјави Саватовиќ.
Редакцијата сега инсистира на писмени гаранции од менаџментот дека професионалните стандарди на телевизијата ќе останат недопрени, нагласувајќи дека вербалните ветувања повеќе не се доволни во оваа клима на неизвесност.
© Vecer.mk, правата за текстот се на редакцијата
