Руската амбасада во Бугарија соопшти дека ја прекинува работата на конзулатот во Софија и на Генералниот конзулат во Варна.
Генералниот конзулат во Русе ќе биде затворен во рок од еден месец.
Одлуката беше изнудена откако бугарската влада денеска објави дека протерува 70 руски дипломати од земјата.
Кога на тоа ќе се додадат и членовите на нивните семејства, околу 200 руски државјани ќе треба да ја напуштат Бугарија до 3 јули, поради што во моментов работата на руската амбасада е блокирана, пренесува Тас.
Да потсетиме, бугарското Министерство за надворешни работи денеска соопшти дека побарало од Русија до 3 јули да повлече 70 членови на дипломатскиот персонал, со образложение дека Русија треба да го намали бројот на персоналот во амбасадата за да се усогласи со бугарската мисија во Москва.
Беше наведено дека првата причина за таквото барање е реципроцитет, пренесува Ројтерс.
„Втората причина се активностите на руските функционери, за кои надлежните бугарски власти утврдија дека не се во согласност со Виенската конвенција за дипломатски односи“, се вели во соопштението.