Турскиот парламент донесе радикален закон со кој официјално се забранува користењето на социјалните мрежи за сите лица помлади од 15 години. Според новата регулатива, дигиталните платформи се законски обврзани да воведат софистицирани системи за проверка на возраста, со што ќе се оневозможи отворањето профили на децата.
Овој закон, кој треба да стапи на сила по шест месеци, им дава на родителите поголема моќ преку нови алатки за контрола на времето поминато пред екраните. Дополнително, платформите се соочуваат со строги рокови, па во итни случаи ќе мора да отстрануваат штетна содржина во рок од само еден час.
Овој потег на Турција доаѓа во време кога низ цела Европа се разгорува дебатата за заштита на младите во дигиталниот простор. Францускиот претседател Емануел Макрон веќе покрена иницијатива за воведување месечен „ден без интернет“, поттикнувајќи ги младите да им се вратат на спортот, читањето и на она што тој го нарекува виталност на реалниот живот. Ваквите апели се вовед во поширок европски координативен состанок каде ќе се разгледуваат слични рестрикции на ниво на целиот континент.
Иницијативата добива силна поддршка и во самиот врв на Европската унија. Претседателката на Европската комисија, Урсула фон дер Лајен, веќе оствари консултации со лидерите на дванаесет земји членки, меѓу кои Германија, Италија и Шпанија, за воведување заеднички стандарди за ограничување на пристапот на децата до социјалните мрежи. Очигледно е дека политичкиот притисок расте, а фокусот се префрла од лична одговорност на родителите кон системска законска регулација на технолошките гиганти.
© Vecer.mk, правата за текстот се на редакцијата
