Страшна семејна трагедија се случи синоќа во населбата Миричина кај Грачаница, Босна и Херцеговина, каде што Сафет Ковачевиќ (68) ја убил својата сопруга Н.К. (68), а потоа си пресудил и себеси, пренесува „Аваз“.
Според неофицијални информации од истрагата, нападот започнал во нивната семејна куќа. Жената успеала да побегне надвор во обид да си го спаси животот, но Ковачевиќ ја бркал, ја стигнал пред куќата и пукал во неа со ловџиска пушка. Веднаш по грозоморниот чин, тој си пукал во главата. Починал во возилото на брзата помош на пат кон болницата во Тузла.
Од локалната полиција потврдија дека инцидентот бил пријавен синоќа околу 19:40 часот.
„На местото на настанот беше пронајдено телото на 68-годишната жена без знаци на живот, додека повредениот маж почина на пат кон медицинска установа“, се вели во полициското соопштение.
Истрагата ја води кантонскиот обвинител, кој треба да ги утврди мотивите и точните околности кои довеле до ова тешко злосторство.
© Vecer.mk, правата за текстот се на редакцијата
