Бран закани со експлозивни направи денеска предизвикаа паника и итни евакуации во неколку држави од регионот. Во Црна Гора, трговските центри „Биг Фешн“ во Подгорица и „ТК Плаза“ во Будва беа испразнети откако по електронска пошта пристигна закана дека во објектите се поставени бомби кои наскоро ќе бидат активирани. Речиси истовремено, заканувачки пораки добија и неколку образовни институции во Никшиќ, по што надлежните обвинителства започнаа итни инспекции на теренот.
Слична е ситуацијата и во Хрватска, каде три трговски центри во Загреб беа евакуирани по дојави за кои загрепската полиција, по неколкучасовни детални проверки, потврди дека се лажни. Слична судбина ги снајде и училиштата и институциите во Зеница, Босна и Херцеговина, каде наставата беше прекината, а децата итно евакуирани. Иако досегашните проверки во Скопје и регионот покажуваат дека станува збор за координирани лажни закани, надлежните служби остануваат во состојба на висока приправност.
© Vecer.mk, правата за текстот се на редакцијата
