Поранешниот грчки премиер Алексис Ципрас приреди вистински политички земјотрес во Атина, претставувајќи го својот нов политички проект со кој се обидува повторно да ја обедини распарчената левица. По долг период на шпекулации, Ципрас во Тисејо ја претстави основачката декларација на партијата ЕЛАС (Грчка левичарска коалиција), симболизирајќи нов почеток по неговото повлекување од СИРИЗА. Името веднаш стана главна тема, бидејќи Ципрас со ова сака да испрати порака за поширок народен фронт, а не за уште една мала партија што само ќе ја пополнува празнината на сцената.
Суштината на новата политичка понуда е спој на силна левичарска реторика и амбиција за преземање на власта преку таканаречен „нов патриотизам“. Новата партија се обврза на седум клучни столбови кои вклучуваат достоинствен живот за сите граѓани, силна демократија без недопирливи, праведен економски развој, моќна социјална држава, отпорност пред климатски катастрофи, дигитален суверенитет и силна надворешна политика.
Жесток фронт против Мицотакис и експресен одговор од власта
Во својот говор Ципрас најостро удри по владејачката Нова демократија и ПАСОК, обвинувајќи ги дека се директно зависни од банките. Тој истакна дека Грција моментално се наоѓа во страшна институционална и социјална криза, апострофирајќи ги скандалите со прислушувањето, корупцијата и железничката трагедија во Темпи како доказ за назадувањето на правната држава. На економски план, најави итна преориентација кон продуктивна економија, со фокус на инвестициите, домашното земјоделско производство и преработувачката индустрија.
Реакцијата од таборот на премиерот Кирјакос Мицотакис пристигна со молскавична брзина, па владини извори веднаш го опишаа Ципрас како „непокајан и непроменет“. Според нив, тој со реториката и со името на партијата покажува единствено желба да ја врати Грција со децении наназад. Оваа експресна војна со зборови уште од првата вечер најавува дека новиот проект на Ципрас влегува во директен судир со актуелната власт, а главниот предизвик допрва ќе биде дали тој може да ја извлече левицата од внатрешните поделби.
© Vecer.mk, правата за текстот се на редакцијата
