Арион Куртај (18), кој е аутистичен, бил на кауција за хакирање на софтверската компанија „Nvidia“ и BT/EE, како и под полициска заштита во хотелот Travelodge кога продолжил со хакирањето и упаднал во „Rockstar Games“, компанија која стои зад ГТА, објави судот, пренесе „Гардијан“.
И покрај тоа што му бил одземен лаптопот, Куртај го извршил сајбер нападот користејќи „Амазон фајрстик“, хотелска телевизија и мобилен телефон. Тој упаднал во внатрешниот систем за пораки на компанијата за да напише: „Ако „Рокстар“ не ме контактира на Телеграм во рок од 24 часа, ќе почнам да го објавувам изворниот код.“
Албанецот Куртај, кој исто така бил дел од хакерската група „Lapsus$“, ги поставил клиповите и изворниот код на форумот. Тој ќе остане во болница доживотно, освен ако лекарите не проценат дека повеќе не е опасен, беше кажано вчера на судот.
Случајот ја поттикна полицијата на Лондон да ги советува родителите да бидат свесни за тоа како нивните деца го користат интернетот.
Како што е наведено погоре, Куртај бил насилен во притвор, со десетици извештаи за повредени или материјална штета. Лекарите го прогласиле за неспособен да му се суди поради неговиот акутен аутизам, а од поротата е побарано да утврди дали тој ги извршил наводните дела или не, а не дали тоа го сторил со криминална намера.
Проценката на менталното здравје користена како дел од сослушувањето за изрекување на пресудата вели дека тој „продолжил да ја изразува својата намера да се врати на сајбер криминалот што е можно поскоро“, додавајќи: „Тој е многу мотивиран“.
На истото судење за измама, компјутерска злоупотреба и уцена е прогласен за виновен уште еден член на „Лапсус$“, кој има 17 години и не е именуван од правни причини.
Тој вчера е осуден на задолжителна рехабилитација.
Како дел од казната, тој ќе има услов за надзор од 18 месеци, услов за рехабилитација од шест месеци и услов за интензивен надзор од три месеци.
Аманда Хорсбург, од полицијата на градот Лондон, рече:
„Овој случај служи како пример за опасностите во кои младите луѓе можат да западнат додека се онлајн и за сериозните последици што тоа може да ги има врз нечија поширока иднина.
„Многу млади луѓе сакаат да истражат како функционира технологијата и какви пропусти постојат. Ова може да вклучува учење да кодираат, интеракција со истомисленици на интернет и експериментирање со алатки.
„За жал, дигиталниот свет може да биде примамлив и за младите од погрешни причини.
Сајбер нападите на бандата помеѓу август 2020 година и септември 2022 година погодија телекомуникациска компанија, производител на компјутерски делови, компанија за игри и други.
Rockstar Games изјави пред судот дека хакирањето ги чинело пет милиони долари, заедно со илјадници часови работно време на персоналот.
© Vecer.mk, правата за текстот се на редакцијата
