Во неодамнешно интервју за CBS News, тој се насмеа на прашањето на новинар за тоа дали планира да задржи наследство од своите деца, потврдувајќи дека отсекогаш имал намера тие сами да си го пробијат патот во светот. Имено, музичарот, кој е татко на шест деца, верува дека би било злоупотреба да им се каже на децата дека не мора да работат.
Став што не се менува
Стинг, чие вистинско име е Гордон Метју Томас Самнер, објасни колку е клучно да се негува работна етика. „Сите мои деца имаат среќа што имаат извонредна работна етика, без разлика дали е во нивните гени или затоа што им реков: „Мора да работите. Јас ги трошам нашите пари“, рече 74-годишниот пејач, според People. „Јас плаќам за вашето образование. Имате чевли на нозете. Одете на работа.“
„Не е сурово“, додаде тој. „Мислам дека во тоа има љубезност и доверба дека ќе го најдат својот пат. Моите деца се жилави.“ Кога го прашале дали таквата филозофија ги фрустрира и дали понекогаш бараат повеќе пари, тој одговорил: „Не, барем не ми го кажуваат тоа во лице.“
Ова не е нова идеја за Стинг. Уште во 2014 година, тој изјави за „Мејл он Сандеј“ дека не сака да ги остави своите деца со средства што би биле „товар околу нивниот врат“. „Тие мора да работат. Сите мои деца го знаат тоа и ретко ме прашуваат за нешто, што навистина го почитувам и ценам“, рече тој во тоа време, додавајќи дека имаат работна етика што ги поттикнува да успеат врз основа на сопствени заслуги.
Тој го повтори истото во интервју за „Пипл“ во 2020 година. „Моите деца се исклучително независни. Тие не седат и не чекаат милостина и не би сакал да им ја одземам таа животна авантура: да заработуваат за живот сами“, рече тој. „Тоа е прекрасна и тешка работа. Затоа не им ветив ништо. Очигледно ќе им помогнам ако се во неволја, но тие не чекаат помош. Тие се премногу независни.“
Шест независни деца
Поранешниот фронтмен на The Police има син, Џо Самнер (49) и ќерка, Фушија Самнер (44), од неговиот прв брак со актерката Франсис Томелти, кој траеше од 1976 до 1984 година.
По десет години врска, во август 1992 година се ожени со Труди Стајлер, со која има четири деца: ќерката Мики Самнер (42), синот Џејк Самнер (40), ќерката Елиот Самнер (35) и синот Џакомо Самнер (30).
Стинг моментално е зафатен со промоција на меѓународната турнеја за неговиот сценски мјузикл „Последниот брод“, кој ќе се појави во Метрополитен операта во Њујорк на 9 јуни.
© Vecer.mk, правата за текстот се на редакцијата
