Поп-ѕвездата беше снимена како се вози во конвој од теренци кон приватниот терминал на аеродромот Ван Најс, кратко откако жената која наводно пукала во нејзиниот дом беше обвинета за обид за убиство. Не е познато дали 38-годишната пејачка патувала поради вознемирувачкиот настан или патувањето било претходно планирано, пишува Дејли Меил.
Детали за нападот и апсења
Во неделата, биле испукани куршуми кон куќата на Ријана, каде што таа наводно била во тој момент. Снимката од повикот на 911 открила драматични детали, а се слушале панични оператори како велат дека кон куќата биле испукани десетина куршуми. Според информациите од полицијата во Лос Анџелес, осомничената испукала неколку куршуми од нејзиното возило, но никој не бил повреден во нападот.
За време на повикот, било наведено дека осомничената возела бела Тесла со привремени, хартиени регистарски таблички. Со преглед на снимките од надзорните камери, полицијата успеала да го добие регистарскиот број. Операторите, исто така, пренесоа опис на возачот - жена со плетенки во кремаста блуза, чиј автомобил беше опишан како валкан одоздола.
Полициски хеликоптер набрзо го лоцираше возилото на паркинг во населбата Шерман Оукс, каде што беше уапсена осомничената.
Кој е осомничениот напаѓач?
Полицијата го идентификуваше напаѓачот како 35-годишната Ивана Ортиз од Флорида. Таа беше обвинета за обид за убиство, а кауцијата беше одредена на 10,2 милиони долари. Медиумите открија дека Ортиз, која се претставува на социјалните мрежи како христијанска инфлуенсерка, упатувала вознемирувачки закани кон Ријана само неколку дена пред пукањето.
Ортиз претходно ѝ е позната на полицијата во Флорида, каде што беше уапсена за семејно насилство, несовесно возење и кршење на условите за нејзиното предсудско ослободување. Минатиот декември, таа поднесе жалба против судската одлука со која старателството над нејзиното дете ѝ беше доделено на нејзиниот поранешен партнер.
Семејството во незнаење
Заминувањето на Ријана од градот дојде откако пејачката, чие вистинско име е Робин Фенти, одлета од аеродромот во мал двомоторен приватен авион. Во времето на пукањето, нејзиниот партнер А$AP Роки не бил дома. Не е познато дали нивните деца - тригодишниот РЗА, двегодишниот Рајот и петмесечниот Роки - биле во вилата.
Извор близок до двојката изјави за The New York Post дека двајцата „не знаат многу“ и не се запознаени со деталите за тоа што се случило. Претставници на пејачката и на полициската станица Беверли Хилс сè уште не дале коментар.
Истрагата е во тек
Случајот го презеде Одделот за грабежи и убиства на полициската станица во Лос Анџелес, а детективите сега работат на утврдување на мотивот за нападот. Ријана ја купила прекрасната вила со пет спални соби и седум бањи во 2021 година. Имотот се наоѓа во затскриена улица, спроти куќата на Пол Мекартни, а Мадона и Мараја Кери живеат во соседството, која со години изнајмува имот во близина.
© Vecer.mk, правата за текстот се на редакцијата
