На краткото рочиште одржано вчера во Вестминстерскиот прекршочен суд, на Бренд му беше дозволено да остане на слобода до следното рочиште, кое е закажано за 30 мај во лондонскиот Висок кривичен суд, познат како Олд Бејли.
Бренд се појави во судницата облечен во црна кошула и фармерки, а лицето делумно му беше скриено со очила за сонце со златна рамка. Тој кимна со главата за да покаже дека ги разбира условите и му се заблагодари на судијата пред да го напушти судот по вкупно 12 минути.
Обвинет за принуден орален секс, сексуален напад...
За време на сослушувањето беа прочитани сите обвиненија против ѕвездата, но Бренд не се изјасни за виновен. Тој зборуваше само за да го потврди своето име и датум на раѓање. На суд, Бренд беше обвинет за силување, принуден орален секс, непристоен напад и сексуален напад. Обвинението за силување се однесува на наводен инцидент од 1999 година, додека принудниот орален секс наводно се случил во јули 2004 година.
Што се однесува до непристојниот напад, Бренд е обвинет дека ја зграпчил жената за рака и ја влечел кон машки тоалет во 2001 година, додека во едно од обвиненијата за сексуален напад се тврди дека ја допирал жената без дозвола помеѓу 2004 и 2005 година. Второто обвинение за сексуален напад доаѓа од жена која тврди дека тој ги допирал нејзините гради без согласност во 2004 година.
„Никогаш не сум бил силувач“
Полицијата започна истрага откако доби неколку пријави од различни жени. Прексиноќа, „Сандеј тајмс“ и „Диспечес“ на „Тајмс“ и „Канал 4“ исто така објавија неколку сериозни обвинувања против Бренд. По повеќекратни полициски испрашувања, комичарот неодамна беше официјално информиран дека ќе биде обвинет за силување, непристоен напад и сексуален напад.
Бренд, кој има три деца со сопругата Лора, негира дека некогаш бил во „неконсензуални врски“. Во неодамна објавено видео на платформата X, тој изјави: „Никогаш не сум бил силувач. Никогаш не сум учествувал во ништо без согласност.“ Тој додаде дека со нетрпение ја очекува можноста да ја брани својата невиност на суд.
Комичарот, кој во последните години стекна голем број следбеници на својот Јутјуб канал, заклучи: „Сега ќе имам можност да се бранам од овие обвинувања на суд и сум исклучително благодарен за тоа“.
© Vecer.mk, правата за текстот се на редакцијата
