Премиерната дружба на македонската публика со неверојатните Barcelona Gipsy balKan Orchestra (BGKO) е закажана за 11 декември. Оркестарот на чело со неверојатната Маргерита Абита од Сицилија, која пред светот ја претстави магичната интерпретација на безвременскиот класик „Море сокол пие“, во главниот град доаѓа во рамки на одбележувањето на 10 јубилеј, а концертот е закажан во Македонската филхармонија со почеток во 20 часот.
Екипата составена од Италијанката Маргерита Абита (вокал), Иван Ковачевиќ (контрабас, Србија), Стелиос Тогиас (перкусии, Грција), Жулиен Шанал (гитара, Франција), Чави Пендон, (кларинет, Шпанија), Пере Ноласк Туру (виолина, Шпанија) и Фернандо Салинас (хармоника, Шпанија) е подготвена за скопскиот концерт и велат дека едвај ја чекаат дружбата со македонската публика.
Меѓу нивните последни интерпретации на традиционални песни од сите краишта на светот е и, како што велат самите, безвременскиот класик, нашата „Море сокол пие“, а на 11 декември публиката ќе може да ужива уште и во изведбите на „Македонско девојче“ и веселата и ритмична румба на кралицата на ромската песна Есма Реџепова - Теодосиевска „Калеја Јаца“. Билетите се пуштени во продажба преку продажната мрежа на МКтикетс , и тоа во три категории и по цена од 1000 и 1200 денари, како и 1500 денари за ВИП влезниците.
Првпат сте во Македонија, кои се вашите очекувања, а кои се вашите ветувања - Што може да очекува публиката?
БГКО: Нашиот прв настап во земјата која ни даде толку многу музички!! На публиката и ветуваме дека ќе добие емоции на различни нивоа, а ние од истата очекуваме да му покажеме на светот дека сепак ова е БАЛКАН!!
На репертоарот имате неколку македонски песни, како го направивте изборот и дали планирате да направите нешто друго, уште некоја преработка?
БГКО: Многу македонски песни поминаа низ нашиот репертоар за 10 години и нема крај на истражувањето на неисцрпните музички богатства на оваа земја. Подготвуваме изненадување какво што моментот и го заслужува!
Во Македонија најмногу внимание привлече вашата изведба на песната „Море сокол пие“, Маргерита која е од Италија и не го зборува нашиот јазик одлично се снајде, како воопшто успевате да звучите толку автентично?
БГКО: Различноста на членовите на бендот, како на географска и културно, така и на музичко ниво, доведува до создавање на веќе препознатлив звук, на кој сме многу горди, но, исто така, и свесни дека ни претстои многу работа, што е една од карактеристиките на нашето постоење и со која ја постигнавме оваа автентичност.
Настапувате во помали сали... дали е намерно за подобра комуникација со публиката и ме интересита дали стравувате кога некаде, како кај нас, првпат настапувате, а на репертоарот имате песни од таа земја?
БГКО: Свириме за луѓе, а не за простор. Имаме настапувано во престижни сали низ цела Европа, како и на импровизирани сцени во сиромашните области на големите градови и за нас нема голема разлика во целта. Бараме емотивен успех, како за нас, така и за публиката.
Стравувањата од изведување песни во земјите од каде потекнуваат тие песни се минато. Нашата музика е прифатена од балканските земји на начин што не исполнува со гордост.
Во Скопје сте како дел од турнејата по повод 10. јубилеј, што се имате планирано за оваа годишнина?
БГКО: Јубилејната година донесе желба да се запловиме во матните води на компонирањето авторски песни. Се разбира, секогаш сме изведувале и авторски материјал, но досега беше само инструментален. Пишувањето зборови на повеќе јазици е нешто што бара храброст, знаење и познанства кои сме ги стекнале со текот на годините.
Последниот албум „Нова ера“ излезе пред две години, дали веќе работите на нов проект и дали може да очекуваме уште некоја македонска преработка?
БГКО: Секогаш сме во процес на создавање. Веќе е снимен дел од авторскиот материјал и се очекува да биде објавен во формат на видеа кои се дел од нашата комуникација со целиот свет од самиот почеток. Вториот дел е планиран за првата половина на следната година, кој ќе го обликува новиот албум.
© Vecer.mk, правата за текстот се на редакцијата
