„Во некои региони, начинот на кој работат тимовите ќе биде целосно реструктуиран“, рече Зеленски во својата редовна вечерна видео порака до сограѓаните, додавајќи дека ова ќе влијае на пресретнувачите, мобилните противпожарни групи и целиот состав на локалната воздушна одбрана.
Соодветните наредби беа донесени за време на консултација со военото раководство, рече тој, пренесе германската агенција.
Украина многу страдаше од руските напади со беспилотни летала и ракети за време на бруталната зима. Во услови на температури кои достигнаа далеку под -10 степени Целзиусови, електричната енергија и греењето беа прекинати во многу градови низ земјата поради руските напади. Милиони Украинци мора да се справат без греење или електрична енергија со часови секој ден.
Зеленски во своето редовно обраќање се осврна и на актуелните енергетски проблеми на сонародниците, притоа заблагодарувајќи им се на службите за цивилна заштита, меѓународните партнери на Украина за нивната испорачана помош и на многуте електричари од енергетските компании кои се обидуваа да поправат барем дел од огромната штета.
Меѓутоа, тој упати и критика за регионалните администрации затоа што не ги пријавуваат проблемите навремено, со што ја влошуваат ситуацијата на теренот, пренесе ДПА.
Покрај Киев, чиј градоначалник Виталиј Кличко е вклучен во повеќекратни јавни конфликти со Зеленски веќе некое време, претседателот ја истакна и ситуацијата во Ахтирка и во неговиот роден град Кривји Рог, потсети ДПА.
© Vecer.mk, правата за текстот се на редакцијата
