„Беше навистина добар разговор, разговаравме за многу детали. Постојат некои нови идеи за тоа како да се приближиме до вистински мир, а тоа се однесува на форматот, состаноците и временската рамка“, објави Зеленски на Телеграм.
Преговарачите на Трамп работат на мировен план
Трамп се залага за договор за ставање крај на речиси четиригодишната војна, а во последните недели, мировните напори предводени од Виткоф и Кушнер напредуваат бавно. Порано оваа недела, Зеленски презентираше нацрт-план за мир од 20 точки, кој го опиша како главна рамка за завршување на војната.
Нацрт-планот е намалена верзија на оригиналниот план од 28 точки што САД претходно го дискутираа со руската страна, кој се смета за во корист на Москва, бидејќи бара од Киев да отстапи територија и да ја ограничи големината на својата војска.
Клучните територијални прашања остануваат нерешени во новиот нацрт од 20 точки, рече Зеленски, додавајќи дека ќе биде потребна средба со Трамп за решавање на најчувствителните прашања.
Русија ги анализира документите
Портпаролот на Кремљ, Дмитриј Песков, претходно денес изјави дека Москва ги анализира документите за крајот на војната што ги донесе во Москва рускиот специјален претставник Кирил Дмитриев од Соединетите Американски Држави. Белата куќа не одговори веднаш на барањето за коментар.
Сепак, портпаролката на руското Министерство за надворешни работи, Марија Захарова, го отфрли како лажен извештајот на Блумберг за руските измени на американскиот мировен план, тврдејќи дека медиумите немаат сигурни извори блиски до Кремљ. Реакцијата дојде откако Володимир Зеленски презентираше план од 20 точки, кој Москва го гледа само како почетна точка за преговори и со кој не е задоволна, особено поради прашањето за Донбас, НАТО и големината на украинската армија.
Зеленски рече дека главниот преговарач на Украина, Рустем Умеров, планира да има уште еден разговор со американските преговарачи вечерва.
„Навистина работиме 24/7 за да ставиме крај на оваа брутална руска војна против Украина и да обезбедиме сите документи и чекори да бидат реални, ефикасни и сигурни“, рече Зеленски.
© Vecer.mk, правата за текстот се на редакцијата
