„Сите академски активности се суспендирани“, објави реформски ориентираниот портал Eslahat News, повикувајќи се на иранското Министерство за наука.
Според извештајот, запрени се и наставата со физичко присуство и онлајн предавањата.
Во меѓувреме, голем дел од Иран и на седмиот ден од војната останува речиси целосно исклучен од глобалниот интернет, соопштија организации што го следат интернет-сообраќајот.
Групата NetBlocks наведе дека интернет-конективноста во земјата изнесува околу еден процент, оценувајќи дека Иран се наоѓа во „дигитален мрак“.
Податоците на технолошката компанија Cloudflare, исто така, покажуваат речиси целосен прекин на интернет-сообраќајот.
Мал дел од воено-политичката елита во Иран и натаму има непречен пристап до интернет. Со години одредена привилегирана група користи таканаречени „бели СИМ-картички“, кои им овозможуваат да ги заобиколат владините блокади и ограничувања.
Иранските медиуми продолжуваат да објавуваат вести и на платформите Телеграм и Икс, кои официјално се забранети во земјата.
Дури и во мирнодопски услови интернетот во Иран е под строга цензура, а многу веб-страници и апликации се блокирани во државата со повеќе од 90 милиони жители.
© Vecer.mk, правата за текстот се на редакцијата
