Заменик-командантот на руската морнарица, генерал-мајор Михаил Гудков, беше убиен во украински ракетен напад, објави руското воено раководство во четвртокот.
Гудков загинал „за време на борбени активности во една од пограничните области на Курската област“, заедно со уште неколку војници, по нападот врз команден пункт, соопшти руското Министерство за одбрана.
Во март 2025 година, Гудков беше именуван за заменик-командант на морнарицата. Тој беше задолжен за крајбрежните и копнените сили на морнарицата, вклучително и единиците на морнаричката пешадија.
Гувернерот на руската далекуисточна област Приморје, Олег Кожемјако, потврди дека Гудков го загубил животот „извршувајќи ја својата војничка должност заедно со соборците“, преку објава на Телеграм.
Тој беше борец со цврст дух кој не се гледаше никаде освен во морнарицата. Дури и како заменик-командант на морнарицата, не престана лично да ги посетува позициите на нашите морнарички единици.
Пентагон го ограничи дел од помошта за Украина поради залихите
Гудков е еден од највисоките руски воени лидери кои беа убиени за време на војната – бројот на загинати генерали се проценува на најмалку дванаесетина, според Вашингтон пост. Во есента 2023 година, Гудков ја доби медалата „Херој на Русија“ за храброст, јунаштво и умешна команда во борба.
Во август минатата година, украинските сили започнаа голема офанзива, преземајќи контрола и окупирајќи значителен дел од територијата во руската Курска област, веднаш преку границата. Тие ја задржаа областа околу девет месеци, но руската армија постепено ја поврати поголемата територија. Сега Украина контролира само мал дел од тоа што претходно го држеше.
© Vecer.mk, правата за текстот се на редакцијата
