Вонредната состојба и општата мобилизација ќе бидат продолжени на 9 мај од 05:30 часот и ќе бидат во сила во наредните 90 дена.
Оваа информација ја објави пратеникот Јарослав Железњак на својот канал на Телеграм.
-Парламентот по 15-ти пат во ова свикување го усвои предлог-законот број 13172, со кој се продолжува вонредната состојба до 6 август (за 90 дена), рече Железњак, пренесуваат украинските медиуми.
За продолжување на вонредната состојба, според него, гласале 357 пратеници, а еден бил против.
Радата одобри и продолжување на периодот на општа мобилизација до истиот датум.
Одлуката ја поддржаа 346 пратеници, еден гласаше против, а еден беше воздржан.
За да стапат во сила овие одлуки, тие мора да бидат потпишани од претседателот на Украина, Володимир Зеленски.
Претходно, на 15 јануари годинава, Врховната Рада донесе одлука за продолжување на вонредната состојба и мобилизација до 9 мај.
Претседателот Зеленски претходно изјави дека вонредната состојба ќе биде укината дури по завршувањето на војната, по што ќе се одржат избори.
Тој додаде дека не се планира одложување на изборите.
© Vecer.mk, правата за текстот се на редакцијата
