Украинските вооружени сили соопштија дека изминатата ноќ спровеле напад на руска воздухопловна база во областа Воронеж каде биле сместени борбени авиони од типовите Су-34, Су-35С и Су-30СМ.
Според украинските информации, нападот на базата во Борисоглебск резултирал со погодување на магацин за бомби, авион за обука, како и друга воена опрема.
Одбранбените сили преземаат мерки за да ја намалат можноста на руските сили да нанесуваат штета на цивилната инфраструктура и да ја принудат Руската Федерација да го прекине вооружениот конфликт против Украина, истакнуваат од украинската команда на своите канали на социјалните медиуми.
Руското Министерство за одбрана потврди дека бил извршен украински напад со беспилотни летала во Воронеж, но не наведе детали за можните штети.
Руските медиуми јавуваат дека неколку украински дронови биле пресретнати и соборени во текот на ноќта.
Очевидци пријавиле експлозии и појава на огнени топки на небото над Воронеж, според локалните извештаи.
Гувернерот на регионот Воронеж, Александар Гусев, објави дека е причинета материјална штета, но дека за среќа нема информации за повредени лица.
Руското Министерство за одбрана дополнително соопшти дека во текот на ноќта биле одбиени вкупно 94 украински напади со беспилотни летала, од кои 34 се однесуваат на регионот Воронеж. Освен тоа, уште два дрона биле соборени при пристап до областа околу Москва.
© Vecer.mk, правата за текстот се на редакцијата
