Обединетото Кралство се подготвува да го намали минималниот праг за гласање на 16 години, пред следните општи избори.
Властите го објавија овој предлог во четвртокот, во обид да го прошират правото на глас и да ги зајакнат основите на општеството за иднината.
Ова значи дека младите, кои веќе придонесуваат кон општеството преку работа, плаќање даноци и служба во армијата, ќе добијат право да одлучуваат за прашањата што ги засегаат. Ова е најголема промена во британската демократија во една генерација.
Ова е прва промена на изборниот праг по повеќе од 50 години, односно од 1969 година кога минималната возраст беше намалена од 21 на 18 години.
Одлуката не доаѓа неочекувано. Лабуристичката партија уште во својот предизборен манифест за 2024 најави дека ќе се залага за гласање и на лицата од 16 и 17 години.
Критичарите тврдат дека целта на оваа промена е да се зголеми сопствената поддршка преку доведување на нова демографска група што претежно гласа за Лабуристите.
Иако нема доволно податоци за изборните намери на 16 и 17-годишниците, анкетите покажуваат дека 36% од гласачите на возраст меѓу 18 и 25 години го фаворизираат Лабуристите. Од истата група, нешто помалку од 20% изразиле поддршка за десно ориентираната партија Реформа на Обединетото Кралство, предводена од Најџел Фараж.
Не можете да кажете: Не ми се допаѓа што може да донесе демократијата, па затоа нема да ја дозволам. Нашата задача е да ги ангажираме луѓето околу важноста на демократијата и нивното право да учествуваат.
Намалувањето на возраста за гласање е само една од реформите што ги предлага Лабуристичката партија. Покрај тоа, се предвидува повеќе автоматизација при регистрацијата на гласачи, како и построги казни за заплашување на кандидати.
Планирано е и олабавување на правилата за идентификација при гласање: ќе се дозволи користење на банкарски картички од домашни институции, дигитални документи и ветерански картички.
Процесот на официјално усвојување на новата возраст ќе потрае бидејќи измените треба да поминат низ Долниот и Горниот дом на Парламентот. Лабуристите имаат силно мнозинство во Долниот дом, а Горниот дом традиционално не се меша во изборното законодавство.
Лабуристите ја презедоа контролата врз британскиот Парламент по минатогодишните избори, ставајќи крај на повеќе од 14 години конзервативна власт.
Владата има рок до август 2029 година за организирање на наредните општи избори.
© Vecer.mk, правата за текстот се на редакцијата
