Претреси се извршени на 59 локации, при што се запленети повеќе од четири и пол тони кокаин, 365.000 евра, бројни луксузни стоки и огнено оружје, пренесе Телеграф.
Припадниците на Националната полиција разбија криминална организација вклучена во трговија со кокаин во пристаништето Валенсија.
Операцијата „Пајак“ резултираше со апсење на вкупно 81 лице - тројца членови на Балканскиот нарко картел, 17 пристанишни работници, девет возачи на камиони и 17 раководители од пет компании, а 59 рации и претреси се извршени на различни локации во провинциите Валенсија и Ибица, каде што се запленети повеќе од 4,5 тони кокаин, 365.000 евра во готово, бројни луксузни стоки и разни огнени оружја.
Осомничените, исто така, ангажирале таканаречени „пајаци“ кои се качувале на контејнери во пристаништето за да пристапат до товарот. Тие им платиле и на сопствениците на транспортни компании, дилери на комерцијални возила и шпедитери, со кои успеале да пристапат до пристаништето.
Истрагата, која започнала на почетокот на 2024 година, открила постоење на криминална организација која работела како нарко-картел во пристаништето Валенсија. За време на истрагата, Националната полиција успеала да спречи осум операции за екстракција на кокаин.
Полициските службеници извршиле 59 претреси на куќи во градот Валенсија и разни градови - Бетера, Албораја, Пикасен, Чива, Бенитусер, Ел Перелон, Балкон де Монтроја, Ла Побла де Валбона, Канет де Беренжер, Суека, Годелета, Таронга, Албалада, Масамагрел, Масалфасар, Седави, Алгемези, Куарт де Поблет и Сагунто - и на островот Ибица.
© Vecer.mk, правата за текстот се на редакцијата
