Администрацијата на американскиот претседател Доналд Трамп започна операција во државата Масачусетс за апсење и депортирање на недокументирани имигранти, објавија „Њујорк тајмс“ и медиумите во Бостон, повикувајќи се на Министерството за внатрешна безбедност, кое соопшти дека цел на операцијата биле „криминални странци“ кои живеат во државата.
Како што објави „Ројтерс“, Министерството за внатрешна безбедност и неговата служба за имиграција и царина (ICE) ја нарекоа тековната операција против имигрантите „Патриот 2.0“.
Се очекува операцијата да трае неколку недели, а како што е најавено, операцијата „Патриот 2.0“ е фокусирана на имигрантите кои се ослободени од притвор.
Министерството за внатрешна безбедност во соопштението наведува дека „ICE апси сексуални престапници, педофили, убијци, дилери на дрога и членови на банди кои се ослободени од локалните власти“.
© Vecer.mk, правата за текстот се на редакцијата
