Американскиот претседател Доналд Трамп уште еднаш ја потврди посветеноста на САД кон НАТО додека разговараше со лидерите на алијансата на дводневниот самит во Хаг, Холандија.
На новинарско прашање за приврзаноста на Америка кон Членот 5 од Повелбата на НАТО, Трамп беше дециден дека го поддржува сојузот.
Со нив сме до крај.
Членот 5 претставува клучен принцип на Северноатлантската алијанса. Имено, се работи за колективна одбрана: напад врз една земја членка на НАТО се смета за напад врз сите.
Страните се согласуваат дека вооружен напад против една или повеќе од нив во Европа или Северна Америка ќе се смета за напад против сите нив, и како резултат на тоа, секоја од нив... веднаш ќе помогне на страна или страни нападнати, преземајќи секакви мерки што ги смета за неопходни, вклучително и употреба на вооружена сила, за да ја врати и одржува безбедноста во северноатлантската област.
Дел од јавноста изразуваше сомнеж дали Трамп целосно ќе стои зад Членот 5, особено по неговите претходни коментари за незадоволство што европските земји вложуваат помалку за заедничката одбрана во споредба со САД. На овогодинешниот самит се очекуваше сите членки да се обврзат дека до 2035 година ќе обезбедуваат најмалку 5% од својот БДП за одбрана.
Ги повикувам на 5% веќе неколку години. Мислам дека ова ќе биде голема вест.
Генералниот секретар на НАТО, Марк Руте, истакна дека има план сите сојузници да инвестираат 5% од БДП за одбрана. Тој особено го пофали Трамп, велејќи дека токму американскиот претседател ја иницираше оваа промена.
Предолго само една сојузничка – САД – ја носеше најголемата тежина. Тоа се менува од денес. Драги Доналде, ти ја овозможи оваа промена.
© Vecer.mk, правата за текстот се на редакцијата
