Доналд Трамп, актуелниот претседател на САД, и израелскиот премиер Бенјамин Нетанјаху синоќа имаа приватна вечера во Белата куќа, што беше нивна трета средба оваа година и се одржа во период на зголемена воена напнатост во Појасот Газа.
Иако разговорите поминаа во официјален тон на успех и партнерство, не можеше да се избегне сенката на 21-месечниот судир помеѓу Израел и Хамас.
Лидерите искористија приликата јавно да ја истакнат својата заедничка акција против ирански нуклеарни постројки, операција што траеше 12 дена и беше оценета како апсолутен успех.
Во знак на благодарност и поддршка, премиерот Нетанјаху на состанокот пренел дека ќе го номинира претседателот Трамп за Нобелова награда за мир, нагласувајќи ја неговата улога како во најновата операција така и во напорите за дипломатско приближување на Блискиот Исток.
Средбата се одржа во Сината соба на Белата куќа, каде што двајцата државници со своите најблиски советници, разговараа за можности да се постигне 60-дневен прекин на огнот во Газа, што може да биде чекор кон дипломатија или барем привремено затишје во регионот.
За сега останува нејасно дали ќе има дополнителен притисок од Трамп врз Израел за трајно примирје, но САД најавија продолжување на соработката со партнерите за стабилизација на ситуацијата на Блискиот Исток.
© Vecer.mk, правата за текстот се на редакцијата
