Американскиот претседател Доналд Трамп одби да одобри пакет воена помош вреден повеќе од 400 милиони долари за Тајван во обид да постигне трговски договор со Пекинг, објави „Вашингтон пост“, повикувајќи се на неименувани американски претставници.
„Претседателот Доналд Трамп одби да одобри повеќе од 400 милиони долари воена помош за Тајван ова лето, додека се обидуваше да преговара за трговски договор и потенцијален самит со кинескиот претседател Си Џинпинг, според пет лица запознаени со ситуацијата“, објави американскиот весник.
Одлуката, која сè уште може да се поништи, претставува промена во политиката на САД кон островот, кој Кина го смета за своја територија, велат изворите.
Според извори запознаени со ситуацијата, пакетот помош што се дискутира вклучува беспилотни летала и муниција и е значително повреден од претходните.
Белата куќа му соопшти на „Вашингтон пост“ дека конечната одлука сè уште не е донесена.
Пекинг го смета Тајван за составен дел од Народна Република Кина, а почитувањето на принципот „една Кина“ е предуслов за другите држави кои сакаат да воспостават или одржат дипломатски односи со него. САД се придржуваат до ова правило и не ја признаваат независноста на островот, но одржуваат блиски контакти со Тајпеј во различни области и го снабдуваат со оружје.
© Vecer.mk, правата за текстот се на редакцијата
