Есмералда Ферер Гарибај (32) и нејзиниот сопруг Роберто Карлос Гил Лисеа (36) починале заедно со нивните деца - синот Гаел (13) и ќерката Реџина (7).
Властите го пронашле семејството на 22 август, но дури сега го потврдија нивниот идентитет, објавува „Дејли меил“.
Есмералда, позната како Есмералда ФГ, имаше десетици илјади следбеници на социјалните мрежи. Таа споделуваше содржини за својот животен стил и патувања, но исто така објавуваше видеа од себе како пее балади „наркокоридо“ за дрога.
Напуштениот пикап со телата бил пронајден во Гвадалахара, Мексико.
Семејството се преселило во метрополитенската област Гвадалахара пред неколку месеци поради работа.
Роберто се занимавал со купување и продажба на возила и одгледување домати во државата Мичоакан. Властите наводно веруваат дека убиствата се поврзани со неговите деловни активности.
Истражителите следеле дел од рутата на пикапот користејќи видео надзор, што ги одведе до блискиот автосервис.
„Местото на настанот беше обработено, а истражувачите пронајдоа повеќе докази што укажуваат дека семејството е убиено таму. Иако форензичките резултати сè уште не се достапни, балистичките и крвните докази речиси сигурно потврдуваат дека тие биле убиени на таа локација“, рече обвинителот Алфонсо Гутиерез.
Двајца мажи присутни во гаражата се приведени за да дадат изјави, но подоцна биле ослободени поради недостаток на докази.
По напуштањето на обвинителството, тие се сретнале со уште две лица кои ги чекале.
Неколку минути подоцна, вооружени мажи ја пресретнале групата и насилно одвеле тројца од нив, додека еден успеал да избега.
Тројца од мажите сè уште се водат како исчезнати, а властите го бараат четвртиот за да добијат негова изјава.
„Истрагите покажуваат дека сторителите го набљудувале излезот повеќе од два часа. Не стануваше збор за директен напад - тие чекаа групата да се помести неколку метри пред да го извршат киднапирањето“, соопшти обвинителството.
Полицијата го истражува убиството и киднапирањето на наводните сведоци.
© Vecer.mk, правата за текстот се на редакцијата
