Иран е подготвен да го намали својот високо збогатен ураниум на пониски нивоа под меѓународен надзор или да го разреди на пониски нивоа, но одбива да го извезува од земјата, додека САД инсистираат на подалечни ограничувања, изјави денес неименуван ирански извор за Ал Џезира.
Техеран, како што истакнува изворот, категорично отфрла секаков извоз на нуклеарен материјал надвор од својата територија, но е подготвен да го намали нивото на збогатување на ураниум на 3,67 проценти и 20 проценти под надзор на Меѓународната агенција за атомска енергија (МААЕ).
Според изворот, Вашингтон во својот предлог бара Иран да ги предаде своите залихи на ураниум збогатени до 60 проценти, што Техеран го отфрла.
Исто така, се наведува дека САД ја отфрлиле Русија како дестинација за преземање на високо збогатениот ураниум на Иран, предлагајќи материјалот да се премести во трета земја, што исто така го отфрлил Иран.
Изворот наведува дека САД бараат целосно прекинување на збогатувањето на ураниум за период од 20 години, што Иран го отфрлил како неприфатливо.
Исто така, се наведува дека Вашингтон го отфрлил иранскиот предлог да му се плати на Техеран компензација за воените загуби.
© Vecer.mk, правата за текстот се на редакцијата
