Нивните сведоштва даваат потресен увид во настаните што се одвивале за време на масакрот.
„Се испаничив и почнав да трчам“
Лахлан Моран (32) од Мелбурн го чекал своето семејство кога ги слушнал истрелите. Тој вели дека во тој момент држел пиво за својот брат, кое го испуштил штом сфатил што се случува, објави Скај Њуз.
„Имаше неколку истрели и јас едноставно целосно се испаничив и почнав да трчам. Почнав да трчам со спринт, едноставно го имав тој инстинкт. Трчав најбрзо што можев“, рече Моран.
Тој додаде дека пукањето продолжило со прекини околу пет минути.
„Звукот од истрелот бил неверојатно гласен“
Грејс, 30, и нејзиниот партнер Џоел Сарџент, 30, исто така од Мелбурн, биле во нивната хотелска соба кога слушнале силни пукотници.
Кога погледнале низ прозорецот, виделе луѓе како трчаат и се кријат.
„Луѓето врескаа, а звукот од огнено оружје беше неверојатно гласен. Беше речиси континуирано, сигурно имало повеќе од 50 испукани куршуми“, рече Грејс.
„Го видов како крвари“
Ричард Хастен учествуваше во настанот „Ханука покрај морето“ на плажата во Сиднеј. Тој изјави за австралиската телевизија ABC дека неговиот внук во тој момент си играл во детскиот агол со животни и дека на почетокот сè изгледало нормално.
„Се спуштив на земја. Лежев таму и жената беше веднаш пред мене и видов дека крвари. Ја соблеков кошулата за да се обидам да го сопрам крварењето“, рече Хастен.
Тој додаде дека мислел дека куршумот ја изгребал по черепот, но дека сега, според него, е „добро“.
„Видовме илјадници луѓе како бегаат“
Зак Бејли изјави за 9 News дека на почетокот тој и другите мислеле дека станува збор за огномет.
„Слушнавме нешто што звучеше како огномет. Плажата беше преполна. А потоа имаше сè повеќе и повеќе „огномет“. Одеднаш видовме илјадници луѓе како трчаат во еден правец“, рече Бејли.
Тој вели дека тој и неговите пријатели се засолниле во објектот и се заклучиле во тоалетите сè додека ситуацијата не била ставена под контрола.
© Vecer.mk, правата за текстот се на редакцијата
