Синот на норвешката принцеза Мете-Марит, Мариус Борг Хоиби, е осомничен за три случаи на силување и уште 23 други кривични дела, информираше полицијата во Осло.
Хоиби, кој има 28 години и е посинок на принцот Хаакон, престолонаследникот на Норвешка, беше уапсен во три наврати минатата година – во август, септември и ноември.
По десетмесечна истрага, случајот е предаден на обвинителството, кое сега треба да одлучува за покренување обвинение.
Мариус Борг Хоиби не носи официјална титула, ниту има кралски должности. Истражувањето започнало по неговото апсење на 4 август под сомнение за напад.
Полицијата во Осло изјави дека спровела темелна истрага во која биле сослушани повеќе сведоци, извршени претреси на повеќе места, како и анализа на голема количина дигитални докази.
Освен трите случаи на силување, Хоиби е осомничен и за четири случаи на сексуален напад и два случаи на нанесување телесни повреди. Полицијата не прецизираше колку жртви се инволвирани, освен дека бројот е двоцифрен.
© Vecer.mk, правата за текстот се на редакцијата
