Владата во Берн објави на X дека американските царини ќе бидат намалени на 15%, исто ниво како и производите што Европската унија ги извезува во САД. Швајцарија не е членка на ЕУ. „Благодарност до претседателот Доналд Трамп за конструктивниот ангажман“, напиша владата на својот официјален X профил.
Деталите за постигнатиот договор ќе бидат објавени подоцна во текот на денот.
Трговски суфицит од минатата година од 38,3 милијарди долари
Претходно, владин претставник во Берн, зборувајќи под услов да остане анонимен, рече дека швајцарските претставници презентирале план за намалување и елиминирање на трговскиот суфицит со САД, додавајќи дека американските претставници очекуваат значително намалување на швајцарските царини за американските производи, како и намалување на нетарифните бариери.
Швајцарија имаше трговски суфицит со САД од 38,3 милијарди долари во 2024 година, според официјалните податоци на САД.
Таа бројка се искачи на 55,7 милијарди долари до јули оваа година, првенствено како одраз на зголемувањето на американскиот увоз од Швајцарија во текот на првиот квартал, пред Трамп да ги воведе своите „реципрочни“ царини на почетокот на април.
© Vecer.mk, правата за текстот се на редакцијата
