Пентагон ѝ даде зелено светло на Белата куќа за испорака на крстосувачки ракети „Томахавк“ со долг дострел во Украина откако процени дека тоа нема негативно да влијае на снабдувањето на САД, оставајќи ја конечната политичка одлука на претседателот Доналд Трамп, изјавија тројца американски и европски функционери запознаени со ова прашање, јавува CNN.
Порано овој месец, за време на работен ручек во Белата куќа, Трамп му рече на украинскиот претседател Володимир Зеленски дека би сакал да не ги испорача тие ракети бидејќи „не сакаме да ги дадеме работите што ни се потребни за да ја одбраниме нашата земја“.
Здружениот штаб на вооружените сили ја информираше Белата куќа за својата проценка пред неколку недели, кратко пред состанокот Трамп-Зеленски.
Зеленски се залагаше за испорака на „Томахавк“ за поефикасно погодување на нафтени и енергетски цели длабоко во Русија.
„Томахавк“ имаат дострел од околу 1.000 милји (приближно 1.600 км).
Се помалку оправдување за Трамп
Проценката ги развесели сојузниците на САД во Европа, кои веруваат дека САД сега имаат помалку оправдување за одбивање на испораката, изјавија двајца европски функционери. Неколку дена пред состанокот, Трамп исто така изјави дека САД имаат „многу томахавки“ кои на крајот би можеле да ѝ бидат дадени на Украина.
Сепак, ненадејна промена на тонот: неколку дена подоцна, на истиот ручек, Трамп во својот воведен говор рече дека на САД „им требаат“ томахавки, а потоа зад затворени врати му рече на Зеленски дека, барем засега, нема да ги даде.
Одлуката следеше еден ден по телефонскиот разговор меѓу Трамп и рускиот претседател Владимир Путин, за време на кој Путин предупреди дека томахавките би можеле да погодат големи руски градови како Москва и Санкт Петербург, дека тоа нема да има значително влијание врз бојното поле, но ќе ги оштети односите меѓу САД и Русија, објави CNN во тоа време.
Белата куќа и Пентагон не одговорија на барањата за коментар.
Извори велат дека Трамп не ги исклучил целосно ракетите и дека администрацијата има планови за брза испорака доколку тој ги нарача.
Неодамна, Трамп беше толку незадоволен од одбивањето на Путин за посериозни мировни преговори што минатата недела одобри нови американски санкции врз руските нафтени компании и засега ја одложи планираната средба со Путин во Будимпешта.
Прашањето за лансирање на ракети останува
Иако Пентагон не изрази загриженост за залихите, американските одбранбени претставници сè уште размислуваат како Украина ќе ги обучи екипажите и ќе ги распореди ракетите. Постојат неколку оперативни прашања што треба да се решат за Украина ефикасно да ги користи Томахавките.
Едно отворено прашање е како Украина би ги лансирала ракетите ако ги добие.
Томахавките најчесто се лансираат од површински бродови или подморници, но украинската морнарица е значително ослабена, па затоа веројатно би било потребно лансирање од копно.
Американската армија разви копнени лансери што би можеле да бидат испорачани во Украина.
Дури и ако САД не сакаат да ги обезбедат лансерите, европските претставници веруваат дека Украина би можела да најде решение. Тие потсетуваат дека украинските инженери веќе ги адаптирале британските ракети „Сторм Шедоу“ за употреба на постари советски авиони.
Во објава на X претходно оваа недела, Зеленски напиша дека Украина сака да ги прошири своите капацитети за долг дострел до крајот на годината, за да може војната да заврши „под пофер услови“ за земјата.
- Глобалните санкции и нашата прецизност се практично усогласени за да се заврши оваа војна под фер услови за Украина, рече тој.
„Сите цели за длабок удар мора да бидат целосно обезбедени до крајот на годината, вклучително и проширувањето на нашиот долг дострел“, рече тој, наведува CNN.
© Vecer.mk, правата за текстот се на редакцијата
