Претставници од Стејт департментот на Соединетите Американски Држави се во Малезија да помогнат при разговорите за прекин на огнот меѓу Тајланд и Камбоџа, најави државниот секретар на САД, Марко Рубио.
Двете југоисточни азиски држави се вмешани во сериозен граничен конфликт од крајот на минатата недела. Борбите до сега одзедоа најмалку 35 животи, а над 218.000 луѓе беа принудени да ги напуштат своите домови.
Изминатиот викенд, претседателот Трамп разговараше со лидерите на Тајланд и Камбоџа, најавувајќи дека веднаш ќе се одржат разговори за прекин на огнот, откако се закани дека ќе ги прекине трговските преговори со тие земји доколку насилствата продолжат.
Во соопштение, Рубио потенцира итноста за двете земји да постигнат прекин на огнот на состанокот во Куала Лумпур, закажан за понеделник во 15 часот по локално време.
САД првично молчеа кога минатиот четврток започнаа борбите. Тогаш, Стејт департментот издаде само апел за "итен прекин на нападите, заштита на цивилите и мирно решавање на спорот".
Но, поради влошувањето на конфликтот, Трамп лично се вмеша и искористи можните трговски договори со Тајланд и Камбоџа како алатка за притисок да се постигне прекин на огнот.
Портпаролката на Стејт департментот, Тами Брус, во изјава го оцени пристапот на претседателот како спој на економски интереси и дипломатија која има цел да донесе регионална стабилност.
Изјавата на Рубио покажува дека САД ја интензивираат својата улога во мировниот процес, особено затоа што коорганизираат дел од разговорите.
Двата премиери — тајландскиот премиер во заминување Фумтам Вечајачаи и камбоџанскиот премиер Хун Манет — потврдија дека ќе присуствуваат на средбата.
Фумтам изјави дека не сака трета земја да посредува во мировните разговори, но го изрази своето задоволство од грижата на Трамп.
© Vecer.mk, правата за текстот се на редакцијата
