Власта во Соединетите Американски Држави донесе одлука за продолжување на вонредната состојба на Западен Балкан за уште една година. Овој чекор е во насока на справување со ризиците што ги носи политичката и безбедносната состојба во регионот.
За прв пат, ваквата вонредна состојба беше прогласена во 2001 година, кога тогашниот американски претседател потпиша извршна наредба во одговор на екстремно насилство и обиди да се попречи спроведувањето на меѓународните договори во Северна Македонија, Босна и Херцеговина и Косово.
Во текот на изминатите години, оваа мерка неколку пати беше проширувана и ажурирана: во 2003, 2021 и најново – јануари 2025 година. Последната одлука вклучува санкции и други активности против поединци и групи кои го нарушуваат мирот, стабилноста и демократските институции во регионот.
Ситуацијата на Западен Балкан и натаму претставува необична и вонредна закана за националната безбедност и надворешната политика на Соединетите Американски Држави.
Санкциите и мерките ќе се однесуваат на лица кои се идентификувани дека преземаат активности што го поткопуваат суверенитетот на државите од поранешна Југославија и Албанија, како и оние што придонесуваат кон корупција и нарушување на стабилноста во регионот.
© Vecer.mk, правата за текстот се на редакцијата
