Сунак треба да ја посети американската престолнина во четврток за да разговара со политичарите во Конгресот, деловните лидери и претседателот.
„САД се нашиот најблизок сојузник. Ние сме меѓусебни партнери кон кои први се обраќаме во сè, од безбедноста на нашиот народ до економскиот раст“, рече Сунак во изјавата пред неговата прва официјална посета на Вашингтон откако стана премиер. „Затоа е толку важно британскиот премиер да гради блиски и искрени односи со претседателот на САД, секој глобален проблем ќе го решиме заедно“, посочи тој.
Сунак и Бајден треба да разговараат за подобрување на економските врски и продолжување на воената поддршка за Украина во нејзината војна со Русија. Но, нема да се зборува за договор за слободна трговија, изјави портпаролот на Сунак оваа недела.
Лондон сака да изгради подобри односи со САД по тензиите предизвикани од излегувањето на Велика Британија од Европската унија во 2020 година. Во април, претставник на Белата куќа негираше дека Бајден е антибританец, откако помина само половина ден во Северна Ирска, а потоа отпатува во Ирска, каде што остана два и пол дена.
Даунинг стрит објави дека средбата на Сунак со Бајден ќе биде негова четврта за четири месеци, што претставува попостојан контакт со американскиот претседател од кој било премиер во последниве години.
© Vecer.mk, правата за текстот се на редакцијата
