Париското обвинителство ја продолжи мерката за засилен надзор над тројца затвореници кои се осомничени дека на социјалните мрежи објавиле видео-снимка со закани упатени кон поранешниот француски претседател Никола Саркози, кој издржува казна во парискиот затвор Ла Санте.
Канцеларијата на парискиот обвинител вчера ја продолжи оваа мерка против тројцата осомничени, откако на социјалната мрежа објавиле видео-снимка на која се слушаат навреди и извици упатени кон Саркози, а која очигледно ја снимил еден затвореник по доаѓањето на поранешниот претседател во затворот Ла Санте, пренесува БФМ ТВ.
Како што се додава во соопштението на обвинителот, управата на затворот извршила претрес при што се запленети два телефона.
Саркози е осуден и затворен во парискиот затвор Ла Санте за заговор за финансирање на неговата изборна кампања во 2007 година со средства од Либија.
На поранешниот француски претседател му се доделени двајца вооружени полицајци да го штитат додека ја отслужува затворската казна.
© Vecer.mk, правата за текстот се на редакцијата
