Германската авиокомпанија „Луфтханза“ се извини за инцидентот во кој премиерите на Финска, Данска и Луксембург беа блокирани на аеродромот во Франкфурт во неделата вечерта поради техничка грешка што предизвика доцнење или неприсуство на самитот на ЕУ и Африканската унија во Луанда, Ангола.
Според неколку дипломати кои разговараа со „ЕурАктив“, тројцата европски лидери, како и високата претставничка на ЕУ за надворешни работи и безбедносна политика, Каја Калас, чекале на пистата на аеродромот на пат кон самитот на ЕУ и Африканската унија во Луанда кога нивниот авион не можел да полета.
Финскиот премиер Петери Орпо подоцна успеал да пристигне во Луанда, иако со големо задоцнување, додека Калас, данската премиерка Мете Фредериксен и премиерот на Луксембург, Лук Фриден, ги откажале своите патувања и останале во Европа.
Портпаролот на „Луфтханза“, Борис Огурски, потврди за „ЕурАктив“ дека летот LH560 на 23 ноември доцнел 13 часа и 25 минути поради дефект во информативниот систем за патници.
„Жалиме за непријатностите што ги претрпеа нашите патници“, рече тој во соопштението.
Огурски додаде дека од „причини за заштита на податоци“ не може да потврди кој бил во авионот.
Според него, можело да се обезбеди заменски авион, но забраната за летови во текот на ноќта што започнува во 23 часот во Франкфурт го направила какво било решение невозможно.
© Vecer.mk, правата за текстот се на редакцијата
