Поранешниот претседател на Јужна Кореја, Јун Сук Јол, одбива да соработува со истражителите, откако тие го притиснаа да одговори на прашања во склоп на истрага за влијание и корупција. При извршувањето на налогот за приведување, Јун демонстративно ја соблече облеката и одби да се придвижи.
Истражителите го повикаа експретседателот на доброволно сведочење во петокот, но тој тврдоглаво се спротивстави на нивните барања.
„Без да ја облече затворската униформа, осомничениот легна на подот и силно го попречуваше спроведувањето на налогот“, изјави помошничката специјален обвинител О Џонг-хи на видео-брифинг.
„Поради загриженост за безбедност, физичка сила не беше употребена и извршувањето на налогот беше привремено прекинато,“ додаде таа.
Министерот за правда Јунг Сунг-хо изјави дека Јун се соблекол до поткошулата и гаќите, одбивајќи да одговори на прашања, а потоа повторно се облекол откако истражителите попуштиле.
Адвокатот на Јун, Ју Џонг-хва, ја критикуваше ваквата комуникација со јавноста, тврдејќи дека официјалните лица го користат изборот на гардероба на поранешниот претседател како средство за да ја нарушат неговата чест.
„Специјалниот обвинител наместо брифинг одржа срамна сцена за лична дискредитација,“ рече адвокатот на Јун за <em>Agence France-Presse</em>.
„Која правна институција во цивилизирана држава во реално време известува медиуми за однесувањето на уапсен, особено за тоа во каква облека е, додека температурата во ќелијата е речиси 40 степени Целзиусови?“ додаде тој.
Јун беше уапсен во јануари по неуспешниот обид да прогласи воена состојба во државата. Во март беше ослободен поради технички причини, откако судот во Сеул пресуди дека агенцијата што го приведе нема надлежност за таква истрага.
Во изминатиот месец Јун повторно беше уапсен, под сомнение дека би можел да уништи докази во тековниот случај.
Во периодот кога беше на власт и прогласи краткотрајна воена состојба, Јун најавуваше приведување на своите политички противници, за кои тврдеше дека се „анти-државни“ дејствувачи и симпатизери на Северна Кореја.
Тој беше импичиран и суспендиран од функцијата во декември, а Уставниот суд на Јужна Кореја ја потврди суспензијата во април.
Ова се случува во период кога Јужна Кореја потпиша договор вреден 450 милијарди долари со Соединетите Држави, со кој се намалуваат американските тарифи од 25% на 15%.
Договорот подразбира дека Јужна Кореја ќе вложи 350 милијарди долари во инвестиции под американска контрола и ќе купи дополнителни 100 милијарди долари во американски енергетски производи.
Претседателот Ли Џе Мјунг изјави дека овој договор ќе помогне корејските компании да навлезат на американскиот пазар во области како што се бродоградба, полупроводници, батерии, биотехнологија и енергетика.
© Vecer.mk, правата за текстот се на редакцијата
