Силните врнежи кои ја зафатија централната област на американската сојузна држава Тексас предизвикаа шокантни поплави и го земаа животот на најмалку 24 лица.
Најкритично беше во округот Кер, каде што за само неколку часа беа регистрирани до 25 сантиметри дожд. Реката Гвадалупе надмина 6 метри висина, брзо се излеа од коритото и поплави големи делови од населбите покрај реката, како и кампови и живеалишта на дивеч.
Спасувачките служби во моментов со чамци евакуираат луѓе кои се отсечени од надојдените води. Локалната власт информира дека бројот на загинати може да се зголеми, бидејќи идентитетот на дел од жртвите сè уште не е потврден.
Ситуацијата се развиваше неверојатно брзо и без доволно најава, изјавуваат надлежните, иако дел од јавноста навреме беше предупредена преку информации од медиуми и служби.
Оваа речна долина се смета за најопасна во САД; тука често се случуваат поплави, но таква силина досега не е забележана.
Гувернерот на Тексас, Грег Абот, истакна дека државата испраќа дополнителни тимови и средства за помош и спасување на жителите во погодените заедници – Кервил, Инграм и Хант. Тој апелираше граѓаните да ги почитуваат насоките од институциите и да не минуваат низ поплавени патишта.
Метеоролозите предупредуваат дека се уште постои опасност, бидејќи нивото на реката продолжува да расте, а некои од мерните станици се веќе поплавени и надвор од функција.
© Vecer.mk, правата за текстот се на редакцијата
